Fotoutstilling på Rådhusplassen
Seks fotografar frå seks diakonale organisasjonar har fotografert menneske i ulike livssituasjonar. Resultatet er utstillinga «Gi oss en drøm vi kan tro på», som opna på Rådhusplassen 26. mai. Målet med utstillinga er å vise fram spennvidden i kva diakoni kan vere.
Namnet på fotoutstillinga er henta frå Lars Saabye Christensen sitt dikt med same tittel, som er skrive til utstillinga. Forfattaren las sjølv opp diktet ved opninga.
Kva er diakoni
— Diakoni er kristendom i praksis. Det er nestekjærleik, sa Ingrid Vad Nilsen i sin tale ved opninga.
Ho understreka at vi alle har eit oppdrag i å vise Guds kjærleik i praksis gjennom handlingane våre.
Oslo-ordførar Marianne Borgen trakk fram dei frivillige si rolle:
— Som ordførar kan eg ikkje uttrykke nok kor takknemleg eg er for innsatsen til desse organisasjonane. Det diakonale arbeidet ville ikkje vore mogleg utan alle dei som gir av tida si, sa Borgen, og takka samstundes alle dei frivillige.
Dei seks organisasjonane og fotografane er:
- Kirkens Bymisjon ved fotograf Torstein Ihle
- Frelsesarmeen ved fotograf Mette Randem
- Kirkens Nødhjelp ved fotograf Håvard Bjelland
- Stiftelsen Signo ved fotograf Elisabeth Moe
- Den norske kyrkja ved fotograf Malin Longva
- Diakonhjemmet ved fotograf Pål A. Berg
Du kan oppleve utstillinga på Rådhusplassen i Oslo fram til 9. juni. Deretter reiser fotoutstillinga vidare til Olavsfest i Trondheim der du kan sjo ho ved Nidarosdomen frå 28. juli til 3. august.